8tif

ಐಡಿಯಾ. . .!

ಅವರು ನನ್ನಪ್ಪನನ್ನು ಚಾಕು ಹಾಕಿ ಕೊಂದರು.

ಇವರು ನನ್ನಮ್ಮನಿಗೆ ಬೆಂಕಿ ಹಚ್ಚಿದರು.

ಹಾಗಿದ್ರೆ ನಿನ್ನಮ್ಮ ನನ್ನಪ್ಪನನ್ನು ಮದುವೆ ಆದ್ರೆ ಹೇಗೆ? ನಾವಿಬ್ಬರೂ ತಬ್ಬಲಿ ಆಗೋದಿಲ್ಲ ಕಣೋ.

ಹೌದು, ಒಳ್ಳೇ ಐಡಿಯಾ . . . . ಇಬ್ಬರೂ ಬಾಲಕರು ಕಣ್ಣೊರೆಸಿಕೊಂಡರು.

(ಅವರಿಗೇನು ಗೊತ್ತು ಅವರ ಐಡಿಯಾದಂತಾದರೆ ಅವರು ಪೂರ್ತಿಯಾಗಿ ಅನಾಥರಾಗುವರೆಂದು?)

ನಾಯಿಹೆಣ

ನೀವು ಯಾಕೆ ಗಲಾಟೆ ಶುರುಮಾಡಿದ್ರಿ? ಇನ್ಸ್ಪೆಕ್ಟರ್ ಗಲಭೆಕೋರರನ್ನು ವಿಚಾರಿಸಿದ.

ಅವರು ಬಾವಿಗೆ ನಾಯಿ ಹೆಣ ಎಸ್ದಿದ್ರು

ಅವರೇ ಅಂತ ನೀವು ನೋಡಿದ್ದೀರಾ?

ಇಲ್ಲ.

ಮತ್ತೆ ಹ್ಯಾಗ್ ಹೇಳ್ತೀರಿ?

ಅವರಲ್ಲದೆ ಇಂಥ ಹಲ್ಕಾ ಕೆಲ್ಸ ಇನ್ಯಾರು ಮಾಡ್ತಾರೆ, ಸಾರ್?

ಇಷ್ಟೇ ಪ್ರೂಫ್ ಸಾಕಾ ಗಲಾಟೆಗೆ?!

ಸಾಕು.

ಹೋಗ್ಲಿ, ಬಾವಿಯಿಂದ ನಾಯಿ ಹೆಣ ತೆಗೆದ್ರಾ?

. . . . . . . . . .

ಸೋಲು

ಅಪ್ಪ, ಅಮ್ಮನನ್ನು ಚಚ್ಚಿ ಹಾಕಲಾಯಿತು. ಚಳಿ, ಹಸಿವುಗಳಿಗೆ ಸಾಯಲೆಂದು ಎಳೆ ಮಗುವನ್ನು ಉಳಿಸಲಾಯಿತು.

ಮಗು ಒಂದೇ ಸಮನೆ ಇಡೀ ದಿನ ಅತ್ತಿತು.

ಸಂಜೆ ಅತ್ತ ಸುಳಿದ ಪೇದೆಗೆ ಮಗುವಿನ ಕ್ಷೀಣದನಿ ಕೇಳಿತು. ಅವನು ಮಫ್ಲರ್ ನಲ್ಲಿ ಮಗುವನ್ನು ಬೆಚ್ಚಗೆ ಸುತ್ತಿ ತಂದು ಹೆಂಡತಿಯ ಮಡಿಲಲ್ಲಿ ಮಲಗಿಸಿ ಮುಗುಳುನಕ್ಕನು.

ಕೊಲೆಗಡುಕರ ಲೆಕ್ಕಾಚಾರಕ್ಕೆ ಸೋಲಾಯಿತು.

ಬಿನೆಗೆಟಿವ್

ಮಗಾ, ನಂಗೆ ಯಾರು ರಕ್ತ ಕೊಟ್ಟಿದ್ದು?

ಅಪ್ಪಾ, ಪಕ್ಕದ್ಮನೆ . . . .

ಆಂ. . . . . ! ಆ ದನ ತಿನ್ನೋನ ರಕ್ತನಾ ?”

ಅಪ್ಪ ಮೂರ್ಛೆ ಹೋದ.

Advertisements